Փամբակ համայնքի Բազում բնակավայրի հուշակոթողների շարքում առանձնանում են տարբեր ժամանակահատվածներում կառուցված հետևյալ հուշարձանները․

• Հայրենական մեծ պատերազմի զոհերին նվիրված հուշակոթողը՝ կառուցված 1987թվականին։
• Երկրորդ աշխարհամարտի զոհերին նվիրված հուշաղբյուրը՝ կառուցված 1967թվականին։
• Վանաձոր-Ստեփանավան թունելի սկզբնամասում  գտնվող Ալեքսանդր Պուշկինի կիսանդրին։ Պատմությունը փաստում է, որ Պուշկինը դեպի Էրզրում ճամփորդելու ընթացքում Բազումի լեռնաշղթայի այս կետի մոտ հանդիպում է մի սայլի, որ Թեհրանից տեղափոխում էր ռուս մեկ այլ նշանավոր գրողի՝ Ալեքսանդր Գրիբոյոդովի դին։ Ի նշանավորումն այս դեպքի՝ հենց այդ վայրում  տեղադրվում է Պուշկինի կիսանդրին՝ դիպվածը հաստատող գրառմամբ։
• 44-օրյա պատերազմում զոհված հայորդիների հիշատակը հավերժացնող խաչքար-հուշարձանը՝ կառուցված 2021 թվականին, Բազում բնակավայրի սկզբնամասում։

   Փամբակ համայնքի Վահագնի բնակավայրում վեր է խոյանում Վահագն վիշապաքաղի արձանը՝ նվիրված Հայրենական մեծ պատերազմի զոհերին: Արձանը խորհրդանշում է հեթանոս Վահագն աստծուն, որի անունով գյուղը կոչվել է Վահագնի: Հուշահամալիրը գտնվում է արահետի սկզբնակետից ոչ հեռու, որտեղից հրաշալի տեսարան է բացվում դեպի գյուղը։

   Ենթադրվում է, որ դեռև 3000 տարի առաջ այստեղ Վահագնին նվիրված հեթանոսական տաճար է եղել։ Գյուղացիներն այստեղ հայտնաբերել են դամաբարաններ, որոնք մասնագետները թվագրում են վաղ բրոնզեդարին։ Հուշարձանը կառուցվել է գյուղացիների նվիրատվությամբ:

   Կոթողի ճարտարապետն է Լիպարիտ Սադոյանը, քանդակագործը՝ Ղուկաս Չուբարյանը (Չուբարը): Հուշարձանի պաշտոնական բացումը տեղի է ունեցել 1973 թվականի մայիսի 3-ին: Արձանին կից կառուցվել է նաև թանգարանային համալիր, որտեղ պահպանվում են են Հայրենական մեծ պատերազնի ընթացքում կյանքը հայրենիքին նվիրած վահագնեցիների նկարները։

  Փամբակ համայնքի Լեռնապատ բնակավայրի հուշակոթողների շարքում առանձնանում են տարբեր ժամանակահատվածներում կառուցված հետևյալ հուշարձանները․

• Հայրենական մեծ պատերազմի զոհերին նվիրված հուշակոթողը
• Եղեռնի զոհերի հիշատակին նվիրվաշ խաչքար-հուշարձանը
• Ղարաքիլիսայի ճակատամարտին նվիրված խաչքար- հուշարձանը
• 1988 թվականի երկրաշարժի զոհերին նվիրված խաչքար- հուշարձանը